Дар яке аз вохӯриҳои «Мактаби ихтиёриёни Ишкошим» дар доираи барномаи гиёҳдармонӣ нозукиҳо ва қоидаҳои ҷамъоварӣ, хушккунӣ, муҳлат ва шароити нигоҳдории гиёҳҳои шифобахш дар Помир муҳокима шуданд. Дар зер нуқтаҳои асосии ин вохӯрӣ оварда мешаванд:
- Пеш аз рафтан барои ҷамъоварии гиёҳҳо худро шуста, либоси тоза пӯшидан лозим аст.
- Ҳангоми расидан ба ҷойи ҷамъоварӣ ҷамъоваранда бояд ба табиат ва гиёҳҳои он ҷо салом диҳад, аз онҳо барои шифои бемориҳо ёрӣ пурсад ва барои зарари расонидааш узр хоҳад.
- Гиёҳҳоро дар назди биноҳо, маҳаллаҳо, дар дохили шаҳр, наздики роҳҳои мошингард ва партовгоҳҳо ҷамъоварӣ кардан тавсия дода намешавад.
- Гиёҳҳоро дар ҳавои намнок ва ҳангоми боришот ҷамъоварӣ кардан тавсия дода намешавад.
- Гулҳо, гулбаргҳо ва сабадгулҳоро дар вақти гулкунӣ аз соати 7 то 11-и субҳ, ҳангоми моҳи пурра, ҷамъоварӣ кардан беҳтар аст (моддаҳои фаъоли биологӣ дар ин вақт аз поён ба боло ҳаракат мекунанд).
- Реша ва решачаҳо бояд аз соати 16 то 18, ҳангоми оғози моҳи нав, инчунин дар тирамоҳ ва баҳор ҷамъоварӣ шаванд (моддаҳои фаъоли биологӣ дар решаҳо ҷамъ мешаванд).
- Мева ва тухмиро танҳо ҳангоми пухта расидан ҷамъоварӣ кардан лозим аст.
- Ғунча ва пӯстро дар баҳор ҷамъоварӣ мекунанд.
- Реша ва решачаҳоро бо белча канда, баъд дар оби хунук шуста, то андозаи 3 см майда кардан лозим аст.
- Гулҳо, гулбаргҳо, пояҳо, мева ва тухмиро дастӣ ё бо ёрии қайчӣ ҷамъоварӣ мекунанд.
- Ҳарорати мувофиқ барои хушк кардани гиёҳҳо 40–60 °C мебошад. Агар дастгоҳи хушккунӣ набошад, мева, реша ва пӯстро дар ҳавои гарм зери нурҳои мустақими офтоб хушк кардан мумкин аст. Гулҳо, гулбаргҳо, пояҳо ва ғунчаҳоро дар ҷойи сояафкан ва шамолрас хушк мекунанд.
- Маҳсулоти хушкшударо дар ҷойе нигоҳ доштан лозим аст, ки аз намӣ муҳофизат шавад.
- Онҳоро дар ҳуҷраи хуб шамолдиҳанда, дар зарфҳои коғазӣ, чӯбин ё шишагӣ нигоҳ доштан лозим аст. Дар рӯи баста ҳамеша санаи ҷамъоварии гиёҳро қайд кунед.
- Гулҳо, гулбаргҳо ва ғунчаҳо аз 1 то 2 сол нигоҳ дошта мешаванд.
- Меваҳо аз 2 то 3 сол нигоҳ дошта мешаванд.
- Решаҳо, решачаҳо ва пӯст аз 3 то 5 сол нигоҳ дошта мешаванд.